1924: Turkistonning parchalanishi

Туркистонда 1924 йилнинг кузида ўтказилган миллий-ҳудудий чегараланиш сиёсати натижасида минтақа парчалаб ташланди. Ўзбекистон ССР, бошқа иттифоқдош ҳамда автоном республикалар ва вилоятлар тузилиши билан большевистик мафкура Ўрта Осиё халқларининг «миллий давлатчилиги» ташкил қилинди, деб иддао қилса ҳам, аслида «мустақил миллий совет республикалари ва автоном вилоятлари» бўлган мазкур тузилмалар давлатчиликдан жуда йироқ эди. Кремль йўргаклаган бундай «миллий тузилмалар» аслида ягона совет давлатининг бир қисми, унинг бўлаклари ҳисобланган. Коммунистик мафкура ҳукмрон бўлган қизил империя даврида халқимиз чегараланиш сиёсатидаги асл ҳақиқатдан, большевикларнинг макру-ҳийласи ва қабиҳ режаларидан мутлақо бехабар эди. Монография Ўзбекистон Республикаси ва Россия Федерациясида сақланаётган архив ҳужжатлари, ёпиқ фондлардаги «мутлақо махфий» маълумотлар ҳамда ўша давр матбуоти материаллари, шунингдек, ўзимизда ва хорижда яратилган тарихий адабиётларнинг қиёсий таҳлили асосида холис ва ҳаққоний ёзилган бўлиб, у Туркистон тарихига бефарқ бўлмаган барча китобхонларга мўлжалланган.