Chorshanba uchun binafsha

Fransuz adabiyotining yirik vakili Andre Moruaning hikoyalari nafaqat fransuz milliy adabiyoti mulki, balki jahon adabiyotining serjilo asarlari sirasidan joy olgan. O‘zbek tiliga o‘girilgan hikoyalari, asosan, ustoz munaqqid, tarjimonlik maktabining zabardast vakili Ozod Sharafiddinov qalamiga mansubligi bois, ushbu to‘plamda yozuvchi hikoyalarini bir tarjimon ijodi asosida mutolaa qilamiz. Yozuvchi hikoyalarining ahamiyatli jihati shundaki, Morua kitobxonga yuzlanar ekan, voqeani shunchaki bayon qilmaydi. Tasvir orqali qahramonning iztiroblari, hayotiy xulosalari, jamiyatning og‘riqli nuqtalari muallif tilidan kitobxon qalbiga alam bilan quyuladi. Va so‘nggi so‘z o‘quvchining iqrori sifatida yuzaga chiqadi.