Dunyoni qutqarmagan go'zallik

Esse - aytish mumkin bo‘lsa, so‘nggi paytlarda kam uchrayotgan janr. Aslida yozuvchilar hayot, insoniyat, jamiyat, siyosat borasidagi xolis fikrlarini aynan shu janrda ifodalashlari osonroq. Chunki xoh hikoya, xoh qissa, boringki, roman bo‘lsin, yozuvchi o‘z mahorati bilan har qanday janrni esse shaklida maromiga yetkazadi. Yosh yozuvchi Sherzod Ortiqov mazkur kitobi bilan erkin janrni yana-da erkinlikka olib chiqdi. Jahon adabiyotining zabardast vakili yoki qaysidir o‘lmas asari xususidagi fikrlarini yoxud qaysidir adabiy-badiiy qahramonni o‘z esselarida jonlantirdi. Andrey Bolkonskiy, Anna, Raskolnikov, Feride va hokazo – ularning bari o‘z mualliflari tomonidan obdan izohlangan, taʼriflangan olam. Ammo muallif qahramonlarning kitobxonlar tomonidan ko‘p va xo‘b muhokama qilingan xislatlarini mutlaqo boshqa rakursdan kuzatadi.