G'arb-u Sharq devoni

Badiiy tarjima ijodiy ish bo'lib, u tarjimon zimmasiga og'ir va mas'uliyatli vazifani yuklaydi. Chunki tarjimon biron-bir asarni tarjima qilar ekan, uni asl nusxadagidek badiiy va janr xususiyatlarini saqlagan holda kitobxonga yetkazib berishi kerak. Kitobxon tarjima asarni o'qiganda, uning tarjima ekanligini unutsin, shundagina mutarjim o'z oldiga qoʻyilgan maqsadni, tarjima qilishdek mas'uliyatli vazifani bajargan bo'ladi. Mazkur kitobga nemis adabiyotining buyuk ijodkori - Yohann Volfgang Gyotening ikkita mashhur asari kiritildi va eng e'tiborli jihati – har ikkala asar asliyatdan tarjima qilingan. Mahoratli tarjimonlar Gyoteni o'zbek kitobxoniga ro'baro' qilarkan, aytish mumkin bo'lsa, har ikkala asarda ham yozuvchini o'zbekcha «gapirtirishga» muvaffaq bo'lishgan.