Gulliverning sayohatlari

Gulliverning ajoyib sarguzashtlari haqida maktab darsliklaridan dastlabki ma’lumotga egamiz. Ingliz yozuvchisi Jonatan Svift qalamiga mansub ushbu mashhur asarning bosh qahramoni shifokor, dunyo kezishdan charchamaydigan sayyohning bir-biridan g‘aroyib mamlakatlarga qilgan safarlari tasvirlanadi. Asarda muallif siyosiy tuzum va ta’lim tizimiga keskin tanqidiy munosabat bildiradi. Svift jamiyatdagi adolatsizlik, ahmoqlik, urushparastlik, ilmsizlik, kibr hamda insoniy axloqning pasayishini kinoya va badiiy obrazlar orqali ochib beradi. O‘quvchi bu asardan inson tabiatining kuchli va zaif tomonlari jamiyatdagi illatlar va ularni qanday tuzatish kerakligi haqida chuqur fikr oladi. Roman bolalar uchun sarguzasht, kattalar uchun esa chuqur falsafiy-satirik asar sifatida qabul qilinadi. U har bir o‘quvchini tanqidiy fikrlashga, jamiyat va o‘zlikni tahlil qilishga undaydi.