Karimbek Kamiy - milliy uyg'onish shoiri

Инсоният тарихий тараққиётида маърифат ва маънавият тушунчалари ҳар доим ёнма-ён юради. Кўп асрлик ўзбек адабиётининг энг мураккаб ва қизиқарли даврларидан бири, шубҳасиз, мана шу Миллий уйғониш даври адабиёти. Профессор Бегали Қосимовнинг қуйидаги фикрлари Миллий уйғониш адабиётининг туб моҳиятини ва бош мақсадларини англашга ёрдам беради: "Адабиёт ҳеч қачон Ватан ва Миллат тақдирига бу қадар яқин келган эмас эди. Ватан ва миллат тақдири ҳеч қачон бу қадар ҳам қаҳр, ҳам фахр билан, ҳам изтироб, ҳам ғурур билан адабиётда акс эттирилмаган эди... Агар бу адабиётнинг бош мавзуини нима десалар, "миллат” дейиш керак бўлади, энг катта дарди нима деб савол қўйилгудек бўлса, “истиқлол" деб жавоб бериш керак бўлади”. Ушбу китоб мана шу адабиётнинг вакилларидан бири Шарифбек ўғли Камий ҳақидадир.