Kishan

Jamiyatning inqirozi, millatning o‘zligini boy berishi, eng avvalo, tafakkur tutqunligidan, fikrga kishan solishdan boshlanadi. Xalqimizning uzoq tarixidagi g‘oyat og‘riqli davr — so‘nggi istibdod yillarida milliy tafakkur xazinalarini g‘orat qilishga, xususan, tarixni soxtalashtirish, tilni kambag‘alllashtirish, adabiyotni qoliplashtirishga uringani bejiz emas. Yozuvchi Olim Toshboyevning yangi "Kishan" romani millatning o‘suviga xalal beruvchi eng katta to‘siq aslida tafakkurdagi kishanlar ekani badiiy bo‘yoqlar orqali tasvirlanadi. Bu to‘siq otani boladan, akani ukadan ayirib yuborishi, oqni qora, qorani oq qilib ko‘rsatishi mumkinligi ta’sirchan tarzda ko‘rsatiladi. Darvoqe, asarda bo‘yidan baland sakrolmagan, lekin xalqning ustida ot o‘ynatishni istagan qahramonlarning turli qiyofasini ko‘rib, uzoq-yaqin o‘tmishimizda yashagan, o‘zi shu elning bolasi, lekin ellik qilmagan arboblar surati xayolingizga kelishi muqarrar. Nachora, bolday yolg‘ondan achchiq haqiqat yaxshi. Zotan, tafakkur ozodligi ham o‘zlikni taftish etishdan boshlanadi…