Mashaqqatlar osha yulduzlar sari

Ushbu to‘plamdan yozuvchi Abduqayum Yo‘ldoshevning turli yillarda yozgan rang-barang mavzulardagi hikoyalari o‘rin olgan. E’tiborli tomoni shundaki, barcha hikoyalarni o‘zaro bog‘lab turgan bir jihat bor. Bu ham bo‘lsa asarlardagi aksariyat yosh qahramonlarning o‘z hayotlarida arzirli yangilanishlar, o‘zgarishlar, istilohlar qilishga urinishlari, o‘zliklarini yaratish istagida jon-jahdlari bilan kurashishlaridir. To‘g‘ri, jarayon oson kechmaydi, aksar holatlarda yutuqdan ko‘ra muvaffaqiyatsizlik, g‘alabadan ko‘ra mag‘lubiyat kutib turadi qahramonlarni. Ammo na iloj, buni hayot deydilar. Muhimi, insonning oldinga intilib yashashi, o‘zini anglash harakati, mag‘lubiyatlardan to‘g‘ri saboq chiqara bilish salohiyatidir.