Muhabbat simfoniyasi

Ulug‘ turk yozuvchisi Rashod Nuri Guntekin 1925 yilda yozilgan “Muhabbat simfoniyasi” (“Dudoqdan qalbga”) romanida turli sotsial qatlamlardan chiqqan qahramonlarning yashash tarzlarini ko‘rsatarkan, davrning ijtimoiy-siyosiy sharoitini ham e’tibordan chetda qoldirmaydi. Milliy an’analar va yangiliklar bilan tanishtirishdan tashqari, umuminsoniy muammolarni ham benihoya go‘zal tasvirlar bilan jonlantiradi, yolg‘onsiz va samimiy ma’nolari bilan keng omma qalbiga kiradi. Ilk romani “Choliqushi”da bo‘lgani kabi, bu asarda ham qahramonlarning hissiy to‘lqinlari, umidsiz yashash manzaralarini ustalik bilan tahlil etadi, o‘quvchini roman qahramonlari Lamia bilan Husayn Kanon ketidan bir Istanbulga, bir Izmirga, Kutahya va Bo‘zyoqaning betakror manzarali bog‘lariga yetaklaydi. Kitobxon qahramonlarning teran va murakkab muhabbatlari qissasini to kitobning so‘nggi sahifasigacha katta hayajon bilan o‘qishi har qanday shubhadan xolidir.