Oq laylak

Oqqan suv daryo... Yurt oshgan ilmi tolib ham tog'ning naq cho'qqisidan uchib o‘tgan oq laylakday bir holatni boshidan kechiradi... Qolaversa, shoir yurakning mehri sog‘inchda, Vatanga, xalqiga, qadrdonlariga muhabbati safarda teranlashadi. Shu evrilish bois Vafo Fayzulloh yangi she’rlar kitobini bir oz boshqacha tartibladi: kitobning birinchi bo‘limi safarda, asosan Rossiya markazida tahsil davrida ko‘z ochgan yangi she’rlaridan iborat. Uzbek va rus tillarida yonma-yon joylashtirilgan ikkinchi va uchinchi bo‘limlarda rus she’riyatidan qilgan tarjimalari va ilk bor shoirning rus tiliga tarjima qilinib, Moskva adabiy nashrlarida yorug‘lik yuzini ko‘rgan she’rlari, asliyat bilan birga hukmingizga havola etilmoqda. Bu bilan ikki til nafosatidan zavqlanib, tarjimalarga xolis baho berish imkoniyati ham yaratilgan.