O'yin

Bolalikda yuz bir xil o‘yin o‘ynamagan odam bormi?! Lekin o‘yin... faqat o‘yin emas. Bolalik o‘yinlari, o‘g‘ildir-qizdir, har bir insonni katta hayotga tayyorlaydi, chiniqtiradi, toblaydi. Chunki bolalik o‘yinlarining har birida katta hayotning barcha manzaralari - kurash, g‘alaba, mag‘lubiyat, quvonch va alam, epchillik va makkorlik, halollik va mug‘ombirlik mujassam. Taniqli adib Xurshid Do‘stmuhammadning navbatdagi romanida eski Toshkentning torgina bir ko‘chasida yashovchi qo‘shni bolalarning o‘yinlar dunyosi ajib bir tarzda hikoya qilinadi. Tabiiy, tengqur, sho‘x-shodon bolakaylar o‘z o‘yinlari-sarguzashtlari orqali kattalarning murakkab hayotiga kirib borayotgan bir paytda qadimiy mahalladagi turar-joylar buzila boshlanadi, shu sabab ko‘ch-ko‘ch avjiga minadi, bolalar dunyosi parokanda bo‘ladi. Oldinda kelayotgan hayot ularni qanday kunlarga ro‘para qiladi? Oradagi bokira mehr-oqibat, do‘stlik rishtalari-chi?.. Roman har bir kitobxonni o‘z bolalik dunyosiga qaytaradi, shavq-zavqqa to‘la xotiralarini yodga soladi.