Sariq ajdar hamlasi

“Sariq ajdar hamlasi” — o‘zbek adibi Mannop Egamberdiyev tomonidan 1984–1988-yillarda yozilgan mashhur tarixiy roman bo‘lib, u ilk bor 1984-yilda Moskvada rus tilida 100 ming nusxada chop etilgan, keyinchalik o‘zbek tilida ham bir necha bor qayta nashr qilingan. Kitobda bundan qariyb 2200 yil muqaddam (miloddan avvalgi II asrda) qadimgi Farg‘ona vodiysida mavjud bo‘lgan Dovon davlati xalqining o‘z mustaqilligi va erkinligi uchun olib borgan mardona kurashi hikoya qilinadi. Xitoyning Xan sulolasi imperatori U-di (Lyu Che) Buyuk ipak yo‘lini to‘liq nazoratga olish maqsadida miloddan avvalgi 104 va 102-yillarda Dovon davlatiga ulkan qo‘shin yuboradi, biroq "Sariq ajdar" ramzi ostidagi ushbu bosqinchilarga qarshilik ko‘rsatgan mard ajdodlarimiz ularni har ikki safar ham mag‘lubiyatga uchratishga muvaffaq bo‘ladilar.