Sergey Brin va Larri Peyj: Google asoschilari

Har bir insonning muayyan sohada yashirin iste'dodi bo'ladi. Jamiyatda qanday mavqega erishishimiz esa ana o'sha noyob qobiliyatni yuzaga chiqara olishimiz yoki uni ruhiyatimizda pinhon saqlashimiz bilan o'lchanadi. Mazkur kitobni o'qir ekansiz, Sergey Brin va Larri Peyjning Stenford universitetida o'qib yurgan kezlarida siz-u biz kabi qalblari yuksak orzularga limmo-lim oddiy insonlar bo'lishganiga guvoh bo'lasiz. Biroq ular muvaffaqiyatga erishish yo'lida shunchaki shirin orzularga berilish bilan cheklanib qolmadilar. Puxta rejalar asosida harakatdan bir zum ham to'xtamagani va omilkorlik bilan qo'l ostidagi xodimlarga ijobiy ta'sir o'tkaza olgani tufayli ulkan korporatsiyani vujudga keltirishdi. Bundan anglashiladiki, yaxshi natija tinimsiz mehnat va favqulodda muhim vaziyatlarda to'g'ri qaror qabul qilish orqali qo'lga kiritilishi mumkin.