Soyabon ostida

Qoʼlingizdagi qissalar va hikoyalar toʼplami yosh adiba Raxshona Аhmedovaning ikkinchi nasriy kitobi. Mazkur toʼplamga jamlangan hikoya va qissalarda adibaning jahongashtaligi, koʼp yurtlar va odamlarni oʼrgangani, kuzatgani bilinadi. Yapon, koreys, xitoy xalqining xarakteri, dunyoqarashi va hayotga munosabatini oʼsha zaminda koʼrib, his etib, yuragidan oʼtkazib, keyin yozgani bir necha hikoyalarida yaqqol seziladi. Osiyo xalqlarining goʼzal, ammo oʼta murakkab olamini ochishda yozuvchi ular bilan baqamti yashagani, hamdam, hamqadam boʼlganini “Аyi”, “Meni kechir, Kumiko!”, “Yukioning tanlovi” kabi hikoyalari soʼzlab beradi. Аdabiyotda eng fusunkor, oʼta talabchan, injiq janr boʼlmish realizmda qogʼoz qoralash koʼpchilikka joʼn yumushdek tuyular, biroq uning tilini tushungan, janr talablarini toʼgʼri anglagangina nimadir yozishi mumkin. Raxshona Аhmedovaning qoʼlingizdagi kitobda jam hikoya va qissalarida realizmning joʼn va benihoya jozibador dunyosi yashirin. Sizga oʼsha olam kengliklarida bahuzur sayr etish nasib etsin!