Sulton Abdulhamid. Qashqirlar bilan o'yin

Sulton Abdulhamid II Usmoniylar saltanatini nihoyatda og‘ir davrda boshqarishiga to‘g‘ri keldi. Bu davrda davlat iqtisodiy jihatdan nihoyatda mushkul vaziyatda bo‘lib, hududiy parchalanish boshlangan edi. Abdulhamid II 1842 yilning 21 sentyabrida dunyoga keldi va 1918 yilning 10 fevralida vafot etdi. Otasi – sulton Abdulmajid, onasining ismi Tirimujgon edi. Abdulhamid o‘n yasharlik paytida onasi vafot etgan. Yoshligida fors, arab, fransuz tillarini o‘rgandi. O‘zidan avvalgi podshohlardan farqli ravishda shahzodalik paytida xorijga sayohat qildi. Parij, London va Venaga bordi. Sulton Abdulhamid II 1876 yilning 31 avgustida taxtga o‘tirdi va hukmronligi 1909 yilning 27 aprelida taxtdan ag‘darilishi bilan nihoyasiga yetdi. Taʼlim, transport va kommunikatsiya, harbiy va boshqa sohalarda islohotlar o‘tkazishga urindi. Juda ko‘p tanqidga uchradi, mustabidlik va zolimlikda ayblandi.