Yangasi maqtagan qiz

Bola aziz, odobi undan aziz. Farzand tarbiyasi, axloqi, kamoloti u yashaydigan xonadondan boshlanadi. Bu ota-onaning feʼl-atvori, oilada oʻzini tutishi, ibratli jihatlari, bolaga nisbatan diqqat-eʼtibori, beradigan tarbiyasi va masʼuliyatiga bevosita bogʻliq. Oilada qiz farzand oʻstirish yanada jiddiy yondashuvni talab etadi. Zero, u kelgusida oʻzga uyga uchirma boʻladi, kelinchak sifatida bir xonadonni obod etadi. Bunga, ayniqsa, onalar sergak boʻlishlari joiz. Zero, qush uyasida koʻrganini qiladi, deb bejiz aytishmagan. Mazkur kitob ana shu xususiyatlari bilan ahamiyatlidir. Uning oʻziga xos eng muhim jihati oilada koʻplab farzandlar oʻstirgan, nevara-chevaralar koʻrgan keksa nuroniylarning fikrlari, muddao, maqsadlari jamlanganidir. «Otalar soʻzi – aqlning koʻzi» deyilganidek, ibratomuz nasihatlar, hayotiy misollar, chiroyli tashbehlar shu insonlarda mujassamdir.